Frétt af mbl.is
Það þykja alltaf stórar fréttir í íslenska bílaheiminum þegar merki skiptir um söluaila, en bráðum mun Brimborg taka yfir sölu Peugeot-bifreiða á Íslandi.
Bernhard á Íslandi hefur verið söluaðili fyrir danska Peugeot-innflytjandann K.W. Bruun síðan árið 2005, en samningur Bernhard við K.W. Bruun gildir óbreyttur til 31. ágúst 2017. Líklegt má því teljast að á tímabili verði tveir innflutningsaðilar á Peugeot á Íslandi og breytingin mun hafa veruleg áhrif á Bernhard á Íslandi enda Peugeot annað af tveimur merkjum innflytjandans.
Hefja sölu strax í sumar
Í fréttatilkynningu frá Brimborg kemur fram að í kjölfar viðamikillar endurskipulagningar í hagræðingarskyni hjá bílaframleiðandanum PSA, sem er eigandi bílamerkjanna Peugeot og Citroën, þá hefur PSA hafið ferli sem miðar að því að setja undir einn hatt innflutning vörumerkjanna tveggja í hverju landi fyrir sig. Breytingar hafa verið gerðar í Noregi og víðar eru breytingar í farvatninu. Þetta mun því einnig hafa áhrif á skipulag innflutnings nýrra Peugeot-bíla og Peugeot-varahluta á Íslandi en Brimborg tekur yfir ábyrgð á innflutningi Peugeot-bíla og varahluta vegna Peugeot til Íslands. Blaðamaður Bílablaðs Morgunblaðsins tók stutt viðtal við Egil Jóhannsson, forstjóra Brimborgar vegna þessa enda að ýmsu að hyggja við breytingar af þessu tagi. „Við reiknum með að Peugeot starfsemi Brimborgar verði komin í gang strax í sumar. Mikil hagræðing mun verða af þessum breytingum þar sem Brimborg mun flytja inn bæði bíla og varahluti beint af framleiðanda eins og verið hefur með Citroën. Hagræðingin mun einnig ná til Citroën þar sem aukið flutningsmagn fyrir bíla og varahluti mun lækka kostnað og ýmis önnur hagræðing mun eiga sér stað. Viðskiptavinir munu í kjölfar þessara breytinga sjá meira úrval Peugeot-bíla í boði á Íslandi, lægra bílverð og lægra varahlutaverð,“ sagði Egill. Fyrstu 100 Peugeot bílarnir hafa verið pantaðir og koma til landsins í næsta mánuði. Þeir eru keyptir fyrir bílaleigurnar, Thrifty Car Rental, Dollar Rent A Car og Saga Car Rental.
Meiri aðgreining merkja
Egill sér mikil tækifæri í Peugeot-merkinu sem mun færa Brimborg enn ofar á sölulista nýrra bíla. „Við munum breyta um áherslur enda þurfum við að auka hlutdeild Peugeot á Íslandi verulega. Við erum að vinna í greiningu á markaðnum í samráði við Peugeot í Frakklandi og vinnum að markaðsáætlun til að koma styrkleikum merkisins á framfæri. PSA Group, sem á bæði merkin, hefur sett upp nýja stefnu þar sem aðgreining verður mun meiri milli merkjanna en áður. Við höfum fengið kynningu hjá PSA þar sem við fengum að gægjast inn í framtíðina fyrir öll merkin þrjú, þ.e. Peugeot, Citroën og DS. Þar hafa þeir aðgreint vörulínurnar algerlega frá hvorri annarri þannig að þær höfða til mismunandi markhópa,“ sagði Egill. „Við höfum sett okkur mjög metnaðarfull markmið, bæði fyrir Peugeot og Citroën, og munu bæði merkin auka hlutdeild sína verulega og nálgast það sem þekkist best í Evrópu en þar er samanlögð hlutdeild merkjanna 7%.“
Átta lúxusbílamerki á næsta ári
PSA-bílasamsteypan er einnig með lúxusmerkið DS en Brimborg reiknar með að kynna DS til sögunnar seinnipart árs 2017. Með því bætist enn eitt lúxusbílamerkið við sölu hér á Íslandi en BL er um það bil að koma með Jagúar-merkið í sölu. Bætast þessi tvö merki við sölu lúxusbifreiða frá Mercedes-Benz, Audi, BMW, Land Rover, Porsche og Volvo. Verða þá átta lúxusbílamerki til sölu á Íslandi þegar þar að kemur. Brimborg mun þá selja sex bílamerki fyrir utan að selja bæði Renault- og Volvo-atvinnubíla. Kallar þessi aukna breidd ekki á stærra húsnæði? „Jú og þess vegna höfum við sótt um lóð á Hádegismóum 7 og fengum úthlutað í síðasta mánuði,“ sagði Egill. „Þangað munum við flytja alla starfsemi Volvo-atvinnutækja en lóðin er 14.000 fermetrar. Við það rýmkar verulega um okkur og gefur okkur ýmis tækifæri. Einnig eigum við lóðina á Breiðhöfða 1, beint á móti Brimborg. Við erum að vinna í púsluspilinu og þetta lofar allt góðu,“ sagði Egill að lokum.
http://www.mbl.is/bill/frettir/2016/02/16/vill_auka_hlutdeild_peugeot_a_islandi/