Spennandi frumsýningar á sumarsýningu Öskju

Það verður sannkölluð sumarstemmning á Krókhálsinum á laugardag en þá mun Bílaumboðið Askja bjóða upp á glæsilega sumarsýningu og frumsýna spennandi bíla. Hér um að ræða Kia Optima og hinn sportlega Kia cee‘d GT. Þá  verður ný kynslóð af hinum stóra og stæðilega G-Lander lúxusjeppa einnig frumsýnd. Öll fjölskyldan ætti að geta notið laugardagsins á sumarsýningunni því boðið verður upp á veitingar auk hoppukastala og andlitsmálningu fyrir börnin.

Mercedes-Benz G-jeppinn hefur verið framleiddur í 35 ár og hefur eftirspurnin aldrei verið meiri. Á sínum langa ferli hefur hann verið valin jeppi ársins 25 sinnum af virtum bílablöðum sem er meira en nokkur annar jeppi sem er á markaði. Nokkrar útlitsbreytingar eru á nýju kynslóð jeppans en hann fær að halda sínu klassíska og virðulega útliti. Þær helstu eru þær að ný LED ljós hafa verið sett fyrir neðan aðalljós og speglum hefur verið breytt. Meiri breytingar eru í innanrýminu og þar er að finna endurhannað mælaborð og stýri.

Kia cee´d GT er sportútfágan af metsölubíl suður-kóreska bílaframleiðandans Kia cee‘d, sem selst hefur mjög vel hér á landi. Kia Cee‘d GT er sportlegur og aflmikill bíll með 1,6 lítra bensínvél með túrbínu og 204 hestöfl. Togið í  Kia cee´d GT er 265 Nm og hann er aðeins 7,7 sekúndur í hundraðið. Þrátt fyrir mikið afl er vélin sparneytin og umhverfismild. Kia cee‘d GT skartar 18 tommu álfelgum, glerþaki, LCD sportmælaborði, Recaro sætum, fótstigum úr áli, LED ljósum, tvöföldu pústkerfi og sportfjöðrun.

Nýr Kia Optima hefur fengið þó nokkra andlitslyftingu. Optima er í boði í þremur útfærslum sem eru allar með 1,7 lítra dísilvélum sem skila 136 hestöflum. Hann verður bæði fáanlegur beinskiptur og sjálfskiptur í EX útfærslu og þá verður hann einnig í boði í Premium útgáfu sem er afar vel búinn bíll. Sá er með Panorama þaki, bakkmyndavél, LED ljósum að framan og aftan, 18 tommu álfelgum, LCD mælaborði og leðursætum svo eitthvað sé nefnt.

Að auki verður öll öll flóra Kia og Mercedes-Benz bíla til sýnis í sumarsýningunni í Öskju kl. 12-16 á laugardag. Boðið verður upp á reynsluakstur á bílum m.a. hinum nýja CLA og þá verða ýmis tilboð á nýjum bílum í tilefni dagsins.