Frétt af mbl.is
Það er ekkert leyndarmál að rafbílar kosta enn meira en bensín- og dísilbílar frá framleiðanda, og njóta góðs af lágum vörugjöldum og sérstökum afslætti af virðisaukaskatti.
Verðið lækkar hratt og tækninni fleygir fram en ljóst að ívilnana verður áfram þörf ef rafbílarnir eiga að geta keppt við hefðbundna bíla.
Skúli K. Skúlason, framkvæmdastjóri sölusviðs BL, segir reynsluna í Danmörku hafa sýnt að ef að ívilnanirnar hverfa snarstoppar rafbílasalan. „Á síðasta ári mátu stjórnvöld í Danmörku stöðuna sem svo að þar sem salan á rafbílum væri orðin nokkuð góð væri óhætt að minnka stuðninginn. Útkoman var sú að salan hrundi. Það sem af er þessu ári hefur ekki einn einasti rafbíll selst í Danmörku.“
Er þetta allt önnur stefna en fylgt hefur verið í Noregi. Segir Skúli að þar fari stjórnvöld vissulega á mis við skattekjur með því að veita rafbílum undanþágu, en stjórnvöld hafi metið það sem svo að samfélagslegur ávinningur af rafbílavæðingu sé fórnarinnar virði.
Að mati Skúla er það áhyggjuefni að yfirvöld hér á landi hafi ekki mótað langtímastefnu þar sem áframhaldandi ívilnanir væru tryggðar. Þess í stað hafa stjórnvöld samþykkt undanþágur eitt ár í senn. „Er það mjög óþægilegt bæði fyrir þá sem flytja inn og selja þessa bíla, en ekki síður fyrir þá sem eru að fjárfesta í og byggja upp innviði um allt land fyrir rafbílaflotann, en gætu staðið frammi fyrir því einn góðan veðurdag að stuðningur ríkisins hverfi og botninn detti þar með úr rafbílamarkaðinum.“
http://www.mbl.is/bill/frettir/2017/03/03/oheppileg_ovissa_um_studning_stjornvalda/