Það voru 760 nýir fólksbílar skráðir í október og samtals 11.448 það sem af er ári. Það eru 2.548 fleiri fólksbílar en á sama tíma í fyrra og jafngildir 28,6% aukningu milli ára. Aukningin er á breiðum grunni, bæði hjá einstaklingum og fyrirtækjum, eftir rólegt ár í fyrra. Rafmagn er algengasti orkugjafinn það sem af er ári með 36% hlutdeild í nýskráningum sem þýðir að meira en 1 af hverjum 3 nýjum fólksbílum er að fullu rafknúinn.
Um miðjan október lagði fjármála- og efnahagsráðuneytið til verulegar breytingar á vörugjöldum af ökutækjum. Í mörgum tilvikum leiða þær til hækkunar. Vörugjald er óbeinn skattur. Breytingar á óbeinum sköttum hafa jafnan áhrif á verðlag eins og t.d. má sjá á því að ráðuneytið telur breytingarnar hafa áhrif á vísitölu neysluverðs. Ef miðað er við reynslu fyrri ára, t.d. þegar VSK-ívilnanir vegna kaupa á rafmagns- og tengiltvinnbílum féllu brott, virðist óhætt að gera ráð fyrir að tillögur ráðuneytisins hafi áhrif á kauphegðun einstaklinga og fyrirtækja. Virðist í því tilliti mega gera ráð fyrir að hluti fyrirhugaðra bílakaupa, sem ella hefðu átt sér stað á næsta ári eða þarnæsta, muni eiga sér stað fyrir lok þessa árs. Ekki er enn að sjá að slíkra áhrifa gæti í tölum um nýskráningar ökutækja enda hefur ekki langur tími liðið frá því að tillögur ráðuneytisins komu fram.
*Janúar-október
*Janúar-október
Einstaklingar keyra áfram vöxtinn í nýskráningu fólksbíla á milli ára. Alls hafa þeir nýskráð 4.684 nýja fólksbíla það sem af er ári sem er 48% aukning milli ára. Orkuskipti einstaklinga eru í fullum gangi og er 62% af nýjum fólksbílum rafmagnsbílar og um 20% tengiltvinnbílar. Hlutfall rafbíla samanlagt er búið að ná fyrra hámarki og er um 82% af nýskráningum einstaklinga.
*Janúar-október
*Janúar-október
Fyrirtæki (önnur en ökutækjaleigur) hafa nýskráð 1.369 nýja fólksbíla það sem af er ári sem er 26% aukning milli ára. Rafmagn er algengasti orkugjafinn með um 55% hlutdeild og þar á eftir koma tengiltvinnbílar með 23% hlutdeild.
*Janúar-október
*Janúar-október
Ökutækjaleigur eru áfram stærsti kaupendahópur nýrra fólksbíla. Það sem af er ári er búið að nýskrá 5.392 bílaleigubíla og fjölgaði þeim um 16% milli ára. Tvinnbílar (e. hybrid) eru algengastir og þar á eftir tengiltvinnbílar (PHEV).
*Janúar-október
*Janúar-október
Kia er mest skráða einstakra bíltegundin það sem af er ári með samanlagt 1.785 nýskráða fólksbíla sem er 16% af öllum nýskráðum nýjum fólksbílum. Þar á eftir kemur Toyota með 1.397 nýja fólksbíla sem er 12% af nýskráningum og síðan Tesla með 1.196 fólksbíla sem er 10% af nýskráningum.