Frétt af mbl.is
Skoda er með vinsælli bíltegundum hér á landi og nýjasta útspilið er líklegt til að styðja við þær vinsældir, því þar er jeppi á ferð.Jeppinn nefnist Kodiaq og var hann kynntur með viðhöfn fyrir blaðamönnum undir lok síðasta mánaðar. Vettvangur kynningarinnar var sú íðilfagra Miðjarðarhafseyja, Mallorca.
Hlaðinn af hagnýtum búnaði
Við kynninguna kom fram að lagt hefði verið upp með að heimfæra núverandi hönnunarheim Skoda yfir á jeppa, og á meðfylgjandi myndum geta lesendur metið hvernig til hefur tekist. Hönnuðir fyrirtækisins höfðu sem fyrr hið tímalausa tékkneska handverk kristalskurðarmeistara til innblásturs við hönnun bílsins. Hitt er óumdeilt að vel er í lagt af hálfu Skoda þegar Kodiaq er annars vegar því hann er hlaðinn búnaði af ýmsu tagi. Má þar á meðal nefna að innandyra er að finna efnivið á borð við burstað ál í bland við leður eða Alcantara, 10 hátalara hljóðkerfi frá Canton, þriggja svæða lofthitastýringu og átta tommu snertiskjá fyrir skipanir og skemmtikerfi. Þá er plássið býsna gott, en Kodiaq státar að sögn af stærsta farangursrými í sínum flokki, eða 720 lítrum sem má breyta í 2.065 lítra með niðurfellingu sæta. Einnig er hann með mesta fótarými farþega í aftursæti, eða 104 millímetra. Þá má fá þriðju sætaröðina upp, en þau sæti falla niður sem gólf farangursgeymslu þegar þau eru ekki í notkun. Loks er gaman að geta þess að báðir framhurðaflekarnir hafa að geyma innfellda regnhlíf í fullri stærð.
Nánar verður sagt frá Kodiaq í reynsluakstursgrein á nýju ári.
http://www.mbl.is/bill/frettir/2016/12/16/kodiaq_laetur_ad_ser_kveda/