Einstakur lúxus í Renault EZ-ULTIMO concept í París
Á bílasýningunni í París sýnir Renault hugmyndabílinn EZ-ULTIMO, alsjálfvirkan, nettengdan og rafknúinn „leigubíl“ í lúxusflokki sem er hugsaður fyrir viðskiptavini sem velja fágætisþjónustu og einstaka upplifun á stórborgarsvæðum. Bíllinn er mannlaus og kemur sjálfur á pantaðan áfangastað. Hugmyndin er að bíllinn sinni þjónustu í einkaferðum sem tekið geta um klukkustund eða heilan dag á ferð milli mismunandi áfangastaða, hvort sem er með einstaklinga, lítinn hóp eða viðskiptavini fyrirtækja sem kaupa þjónustuna sérstaklega fyrir verðmæta viðskiptavini sína.
Ný kynslóð „limmósín“
Með EZ-ULTIMO er Renault í raun að færa viðskiptahugmyndina um rekstur löngu glæsikerranna (limosine) á alveg nýtt stig hvað varðar glæsileika og þægindaþjónustu en þar sem bíllinn er alsjálfvirkur er ekki gert ráð fyrir bílstjóra undir stýri. EZ-ULTIMO er vönduð og vel útfærð setustofa í hæsta gæðaflokki sem flytur viðskiptavini sína milli spennandi og áhugaverðra áfangastaða í borginni og utan hennar.
Ný viðskiptatækifæri
Það er sýn Renault að þróun raftækninnar og sífellt aukin sjálfvirkni bíla muni skapa ný og spennandi viðskiptatækifæri í ferðaþjónustu, hvort sem er í vel útfærðri lúxusþjónustu í hæsta gæðaflokki, bæði fyrir sérvalda hópa og viðskiptavini fyrirtækja sem fara í skipulagða dagsferðir eða fyrir þá sem langar bara að upplifa munaðinn, tæknina og sjálfvirkni bílsins með því að kaupa stutta bílferð í einstökum lúxusbíl 21. aldar.
Fyrir kröfuharða viðskiptavini
Til að þróa hugmynd sína um EZ-ULTIMO frekar hefur Renault Group fjárfest í tæknifyrirtækinu Groupe Challenges og hafið vinnu við fyrsta verkefni með sérfræðingum þess sem ber vinnuheitið Augmented Editorial Experience – AEX. Teymið hefur það verkefni að halda áfram vinnu við þróun og útfærslu fyrirhugaðra eiginleika EZ-ULTIMO sem eiga að uppfylla væntingar kröfuharðra farþega.