Sala á nýjum fólksbílum í nýliðnum janúar jókst um 25,5% miðað við sama mánuð fyrir ári. Nýskráðir fólksbílar voru 680 stykki á móti 542 í fyrra.
Í tilkynningu frá Bílgreinasambandinu segir, að búist sé við áframhaldandi jákvæðri þróun í sölu nýrra bíla, enda bílaflotinn gamall og þörfin fyrir endurnýjun mikil.
Bílgreinasambandið spáir því að á þessu ári muni nýskráningar fólksbíla verða í kringum 10.800 stk. Á árinu 2014 voru nýskráðir 9536 fólksbílar og er því gert ráð fyrir um það bil 14% aukningu á þessu ári frá því fyrra segir, að sögn Özurs Lárussonar framkvæmdastjóra Bílgreinasambandsins.