LÖG
BÍLGREINASAMBANDSINS
1. gr.
Nafn.
Nafn sambandsins er Bílgreinasambandið, að viðbættri skýringunni:"Samtök atvinnurekenda í sölu ökutækja, vöru og þjónustu þeim tengdum.
2. gr.
Varnarþing.
Heimili og varnarþing sambandsins er í Reykjavík.
3. gr.
Tilgangur.
Tilgangur sambandsins er:
1. Að vera í málsvari fyrir sambandsaðila um málefni bílgreinarinnar gagnvart öllum opinberum aðilum, samtökum, framleiðendum, öðrum viðskiptamönnum og almenningi.
2. Að efla og þróa bílgreinina á Íslandi, með því að:
a) halda utan um stefnumörkun í málefnum bílgreinarinnar.
b) vinna að eflingu menntunar til aukinnar þekkingar innan bílgreinarinnar.
c) vinna að eflingu faglegra vinnubragða innan bílgreinarinnar.
d) vinna að því að viðhafðir séu réttmætir viðskiptahættir innan bílgreinarinnar.
e) vera í forsvari fyrir bílgreinina við gerð kjarasamninga sem stuðli að gagnkvæmum hag samningsaðila.
f) Að stofna til, skipuleggja og halda sýningar á bifreiðum, hlutum tengdum þeim og iðnaðinum í heild.
3. Að vera sambandsaðilum leiðbeinandi um gildi faglegra vinnubragða til aukinnar hagkvæmni og arðsemi í rekstri sambandsaðila.
4. Vinna að umhverfisvernd og stuðla að bættri umferðarmenningu og auknu umferðaröryggi.
5. Að láta til sín taka öll málefni sem hafa almenna þýðingu fyrir sambandsaðila og eflingu bílgreinarinnar í landinu.
4. gr.
Innganga.
Aðild að sambandinu geta öðlast fyrirtæki og einstaklingar sem annast sölu á ökutækjum, vöru og þjónustu þeim tengdum. Umsóknaraðilar þurfa að fullnægja kröfum sambandsins og yfirvalda um útbúnað, tæki, starfsumhverfi o.þ.h. Jafnframt skulu þeir fylgja viðurkenndum meginreglum um góða viðskiptahætti og séu að öðru leyti þannig, að aðild þeirra samrýmist hagsmunum sambandsins.
Umsókn um inngöngu sendist skriflega til skrifstofu sambandsins ásamt upplýsingum, sem stjórnin telur ástæðu til að krefjast.
Formaður skal bera inntökubeiðnina undir stjórn sem tekur ákvörðun um afgreiðslu hennar.
5. gr.
Sérstakar félagsskyldur.
1. Skilyrði fyrir inngöngu er að skrifstofu sambandsins séu veittar allar upplýsingar um aðstæður fyrirtækisins, sem stjórnin telur nauðsynlegar, svo tilgangi sambandsins verði náð og til ákvörðunar árgjalda.
2. Með upplýsingar, sem látnar verða í té, skal farið með sem algjört trúnaðarmál. Þær má aðeins ræða í stjórn sambandsins eða á fundum þess eftir tölulega úrvinnslu og án tilgreiningar einstakra fyrirtækja.
6. gr.
Úrsögn.
1. Aðila er heimilt að segja sig úr sambandinu með minnst 4ra mánaða fyrirvara. Úrsögn skal vera skrifleg og sendast skrifstofu sambandsins. Aðilar, sem úr sambandinu ganga, eiga ekki kröfu til endurgreiðslu árgjalds, annarra framlaga til sambandsins eða nokkurs hluta af eignum þess.
2. Ekki má aðili segja sig úr sambandinu meðan vinnudeila (verkbann eða verkfall) stendur yfir.
3. Aðilar sambandsins, sem skulda árgjöld, eða önnur framlög til sambandsins fyrir meira en eitt ár, skulu taldir segja sig úr sambandinu enda verði þeir ekki við greiðsluáskorun, sem send skal þeim í ábyrgðarbréfi með einnar viku fyrirvara. Framlög þessi má innheimta með málsókn, og má höfða slíkt mál á varnarþingi sambandsins skv. 2. gr.
7. gr.
Brottrekstur.
Víkja má aðila úr sambandinu um lengri eða skemmri tíma, þegar stjórn þess telur fullvíst, að eigandi eða ábyrgur stjórnandi viðkomandi fyrirtækis hafi gerst brotlegur. Skal einu gilda hvort hann hafi brotið skráð eða óskráð lög, venjur um góða viðskiptahætti eða neitað að veita sambandinu upplýsingar skv. 5. gr.
Stjórn sambandsins tekur ákvörðun um brottvikningu til sambandsfundar.
8. gr.
Aðalfundur.
Aðalfundir fara með æðsta vald í málefnum sambandsins en almennir félagsfundir á milli aðalfunda.
Aðalfund skal að jafnaði halda fyrir lok maí mánaðar ár hvert. Heimilt er þó þegar sérstaklega stendur á að halda aðalfundinn á öðrum tíma enda samþykki stjórnin það. Til aðalfundar skal boða með tveggja vikna fyrirvara með bréfi til sambandsaðila eða með auglýsingu í dagblaði.
Dagskrá fundarins skal vera sem hér segir:
1) Skýrsla stjórnar.
2) Reikningar bornir upp til samþykktar.
3) Kosning formanns.
4) Kosning stjórnar og varamanna.
5) Lagabreytingar.
6) Önnur mál.
9. gr.
Lögmæti aðalfundar, atkvæðisréttur.
Aðalfundur er lögmætur ef löglega er til hans boðað án tillits til fundarsóknar. Aðalfundi stjórnar fundarstjóri sem aðalfundur kýs. Fundarstjóri kannar lögmæti fundarins.
Einfaldur meirihluti nægir til löglegra samþykkta á aðalfundi.
Sérhver sambandsaðili hefur eitt atvæði og síðan eitt atkvæði fyrir hver 80 þúsund krónur sem hann greiðir umfram 50 þúsund krónur til sambandsins.
Aðili sem eigi getur sótt aðalfund getur látið starfsmann sinn eða annan sambandsaðila sækja aðalfund fyrir sína hönd, enda fái hann til þess skriflegt umboð. Enginn getur þó farið með atkvæði fleiri en tveggja aðila auk síns (sinna ) eigin.
Atkvæðagreiðsla á aðalfundi skal fara fram með handauppréttingu, nema 3 menn krefjist skriflegrar atkvæðagreiðslu. Einfaldur meirihluti atkvæðamagns ræður úrslitum mála sbr. þó 19. grein varðandi lagabreytingar.
Þeir einir njóta atkvæðisréttar sem eru skuldlausir við Bílgreinasambandið á aðalfundi, miðað við álögð gjöld um síðustu áramót.
10. gr.
Félagsfundir.
Almenna félagsfundi Bílgreinasambandsins skal halda þegar stjórnin telur ástæðu til eða ef 10 sambandsaðilar fara fram á það. Fundinn skal boða svo fljótt sem unnt er.
Nefndir á sérsviðum sambandsins skulu standa fyrir félagsfundum fyrir sína félagsmenn í samráði við stjórnina. Félagsfundi skal boða með minnst viku fyrirvara nema sérstakar ástæður mæli með því að boða til hans með skemmri fyrirvara. Félagsfundum stýrir fundarstjóri sem fundurinn kýs. Fundarstjóri tilnefnir fundarritara. Í fundarboði skal getið hvert fundarefnið er. Ekki er heimilt að álykta um fundarefni sem ekki hefur verið auglýst fyrirfram nema með samþykki 3/4 hluta fundarins.
Um atkvæðagreiðslur skulu gilda sömu reglur og á aðalfundi.
11. gr.
Stjórn.
Kjörgengir í stjórn sambandsins eru atkvæðisbærir félagsmenn og fulltrúar fyrirtækja sem aðild eiga að Bílgreinasambandinu.
Stjórn sambandsins skipa 5 menn. Stjórnarmenn skulu kosnir á aðalfundi þannig, tveir menn frá hópi fyrirtækja á sölusviði og tveir menn úr hópi þeirra fyrirtækja sem starfa á þjónustusviði. Þá skulu kosnir tveir menn til vara, einn frá hvorum hóp. Formaður skal kosinn sérstaklega.
Stjórnarmenn skulu kosnir til tveggja ára þegar þeir eru kosnir í fyrsta sinn. Sama regla gildir þegar formaður er kosinn fyrsta sinni. Varamenn skulu kosnir til eins árs í senn.
12. gr.
Verkaskipting stjórnar.
Stjórnin skal á fyrsta fundi sínum eftir aðalfund kjósa sér varaformann og ritara. Varaformaður skal ekki koma úr sama hópi og formaður, sbr. 11. gr.
Formaður boðar stjórnarfundi þegar þurfa þykir en auk þess er honum skylt að boða til fundar ef 2 stjórnarmenn krefjast þess. Fundur er lögmætur og ályktunarfær ef meirihluti stjórnarmanna er mættur. Hver stjórnarmaður hefur eitt atkvæði. Ef atkvæði falla jöfn, ræður atkvæði formanns.
Stjórnin ákvarðar árgjöld til sambandsins.
Undirskrift formanns og eins meðstjórnanda nægir til að skuldbinda sambandið gagnvart öðrum.
Stjórnin ræður málefnum Bílgreinasambandsins á milli almennra félagsfunda og aðalfunda.
Stjórnin kemur fram fyrir hönd Bílgreinasambandsins.
Stjórnin ákvarðar hvaða mál stjórn Bílgreinasambandsins tekur til umfjöllunar og ákveður starfssvið stjórnar. Telji hún þörf á nánari faglegri umfjöllun um tiltekin mál vísar hún þeim til viðeigandi nefndar, sbr. 14. gr.
Fundargerð skal haldin um það sem fram fer á stjórnarfundum og skal fundargerð borin undir stjórn til staðfestingar.
13. gr.
Nefndir
Á milli stjórnarfunda vinna einnig nefndir á sérsviðum sambandsins þ.e. sölusviði og þjónustusviði. Nefndin á sölusviði fer með málefni bifreiðainnflytjenda, bílasala, tækja- og varahlutasala og annarra á aðila á sölusviði. Nefndin á þjónustusviði fer með málefni sem annast viðgerðir og aðra þjónustu við ökutæki og í tengdum greinum. Stjórn Bílgreinasambandsins skipar fulltrúa í nefndirnar að fengnum tillögum frá aðildarfélögum. Nefndarmenn kjósa sér formann.
Nefndir vinna að hagsmunamálum þeim sem þær varða og stjórnin hefur beint til þeirra. Þær skila niðurstöðum sínum til stjórnar.
Nefndirnar geta leitað til vinnuhópa til þess að fjalla nánar um þau málefni sem eru til umfjöllunar hjá nefndunum.
14. gr.
Svæðisfulltrúar.
Landinu skal skipt í átta svæði, sem hér segir:
1) Stór-Reykjavík (Reykjavík, Kópavogur, Hafnarfjörður, Seltjarnarnes,
Garðabær og Mosfellsbær),
2) Reykjanessvæði (Reykjaneskjördæmi að undanteknum Kópavogi,
Hafnarfirði, Seltjarnarnesi, Garðabæ og Mosfellsbæ).
3) Vesturland,
4) Vestfirðir,
5) Norðurland vestra,
6) Norðurland eystra,
7) Austurland,
8) Suðurland,
Stjórn sambandsins skal skipa sérstaka trúnaðarmenn (svæðisfulltrúa) á ofangreindum svæðum, einn eða fleiri á hverju svæði. Jafnframt er heimilt að skipa sérstakar svæðastjórnir. Hlutverk svæðisfulltrúa skal m.a. vera að afla sambandinu nýrra meðlima á svæðinu og kom á samvinnu þeirra á milli um sameiginleg hagsmunamál.
Stjórn Bílgreinasambandsins skipuleggur svæðafundi eftir því sem þurfa þykir. Stefnt skal að því að boða svæðafulltrúa a.m.k. árlega til sameiginlegs fundar.
15. gr.
Framkvæmdastjóri og skrifstofa.
Stjórnin ræður framkvæmdastjóra fyrir sambandið. Hann stjórnar skrifstofu þess. Hann hefur á hendi allar daglegar framkvæmdir og annast ráðningu aðstoðarfólks.
16. gr.
Árgjöld.
1. Inntökugjald skal greitt eigi síðar en einum mánuði eftir að stjórn sambandsins hefur samþykkt inntökubeiðnina. Árgjöld skulu að hluta til vera föst upphæð, sú sama fyrir alla og að hluta upphæð, sem skal vera í hlutfalli við stærð fyrirtækis, t.d. fjölda seldra eininga eða upphæð greiddra launa, fjölda starfsmanna, eða veltu árið áður.
Árgjöldin falla í gjalddaga 1. janúar ár hvert, fyrirfram.
Nýir félagar greiði tillag fyrir hvert hálft ár, sem er að líða þegar þeir ganga í sambandið. Þeir sem segja sig úr því, greiða tillög til næstu áramóta frá úrsögn, en hætti fyrirtæki á árinu, greiði fyrirtækið árgjald til loka þess ársfjórðungs, sem stjórn er tilkynnt að fyrirtækið sé hætt að starfa.
2. Ef sambandsaðili lætur undir höfuð leggjast að veita upplýsingar, sem nauðsynlegar eru til ákvörðunar árgjalds hans, skal stjórnin áætla honum hæfilegt árgjald.
17. gr.
Varasjóður.
Innan sambandsins skal starfa varasjóður, sem skal vera styrktarsjóður í vinnudeilum o.fl. Sambandsfundur setur sjóðnum reglugerð.
18. gr.
Reikningar- Fjárhagsáætlun.
Reikningsár sambandsins er almanaksárið.Löggiltur endurskoðandi skal endurskoða reikninga og skila athugasemdum til stjórnar sambandsins.
Fyrir 15. apríl ár hvert, skal framkvæmdastjóri hafa lokið við reikninga fyrir liðið starfsár og sent þá endurskoðanda er skilar stjórninni athugasemdum sínum innan 14 daga.
Þá skal framkvæmdastjóri leggja fjárhagsáætlun næsta starfsárs fyrir stjórn sambandsins eigi síðar en 30. nóvember ár hvert. Áætlunin skal endurskoðuð og lögð fram í endanlegri mynd eigi síðar en mánuði fyrir aðalfund þess.
19. gr.
Lagabreytingar.
Tillögur til breytinga á lögum Bílgreinasambandsins skulu sendar stjórn sambandsins, er leggur þær fyrir aðalfund. Slíkar tillögur þurfa að berast eigi síðar en þremur vikum fyrir aðalfund. Til að slík tillaga nái fram að ganga þarf samþykki 2/3 hluta greiddra atkvæða.
20. gr.
Gildistaka laganna.
Lög þessi öðlast þegar gildi, og falla jafnframt úr gildi eldri lagaákvæði Bílgreinsambandsins.
Reykjavík, mars 2007